Գործընկերություն հանուն բաց հասարակության նախաձեռնությունը, որը ներկայացնում է քաղաքացիական հասարակության վաթսունից ավել կազմակերպություն, կազմակերպեց Հայաստանում Եվրոպական հարևանության քաղաքականության և Արևելյան գործընկերության ծրագրերի իրականացմանը նվիրված քննարկում: Քննարկումը կազմակերպվել է “Հարևանությունից դեպի գործընկերություն” խորագրով միջոցառումների շրջանակներում, որի նախաձեռնողներն են Բաց հասարակության ինստիտուտի օժանդակության հիմնադրամի հայաստանյան մասնաճյուղը, Եվրասիա համագործակցության հիմնադրամը, Երևանի մամուլի ակումբը, “Թրանսփարենսի ինթերնեշնլ” հակակոռուպցիոն կենտրոնը, Մարդկային զարգացման միջազգային կենտրոնը, Եվրոպական ինտեգրացիա  կազմակերպությունները: Միջոցառումը տեղի ունեցավ 2009թ. հուլիսի 3-ին, ժամը 14:00-ին Հայաստանի Ամերիկյան համալսարանի բիզնես կենտրոնում:

Միջոցառման ընթացքում Հայաստանում Եվրահանձնաժողովի պատվիրակության նախագահ, դեսպան Ռաուլ դե Լուզենբերգերը ներկայացրեց 2008թ. Հայաստանում ԵՀՔ ծրագրի իրականացման վերաբերյալ զեկույցը, իսկ ՀՀ –ում Լիտվայի Հանրապետության դեսպան Գեդրիուս Ապուոկասը անդրադարձավ <<Հայաստանի ինտեգրումը Եվրամիությանը Արևելյան Գործընկերության նախագծի համատեքստում>> թեմային: Համազեկուցողների շարքում էին տկն. Լուսինե Մովսիսյանը, ՀՀ Արտգործնախարարության Եվրամիության բաժնի առաջին քարտուղար, ինչպես նաև <<Թրանսփարենսի Ինթերնեշնլ>> հակակոռուպցիոն կենտրոնի նախագահ տկն. Ամալիա Կոստանյանը և Երևանի մամուլի ակումբի նախագահ պրն. Բորիս Նավասարդյանը: Միջոցառման մյուս համազեկուցողները` Ծրագրերի կառավարման գործակալության պետ պրն. Ռուբեն Սարուխանյանը և Եվրամիության և միջազգային տնտեսական համագործակցության վարչության պետ պրն. Վարոս Սիմոնյանը ՀՀ Էկոնոմիկայի նախարարությունից, որոնք թեպետ նախապես հաստատել էին իրենց մասնակցությունը, չներկայացան քննարկմանը:

Քննարկմանը մասնակցել են ՀՀ նախարարությունների ներկայացուցիչներ, պետական պաշտոնյաներ, ՀՀ-ում հավատարմագրված դեսպաններ, միջազգային կազմակերպությունների, քաղաքացիական հասարակության ներկայացուցիչներ, լրատվամիջոցների ներկայացուցիչներ: