Իր խախտված իրավունքները վերականգնելու համար «Ունիսոն» է դիմել Գագիկ Նավասարդյանը: 2007թ.-ին դժբախտ պատահարի հետևանքով նա ենթարկվել է վիրահատության, և նրա ձախ ստորին վերջույթը անդամահատվել է:

Դեպքից հետո` 12.12.2007թ-ին, Գեղարքունիքի մարզի թիվ 1 ԲՍՓՀ-ի կողմից կատարվել է փորձաքննություն և սահմանվել 2-րդ խմբի հաշմանդամություն մեկ տարի ժամկետով:

04.12.2008թ.-ին մեկ տարվա ժամկետը լրանալու պատճառով կատարվել է վերափորձաքննություն, որի արդյունքում Գ.Նավասարդյանը ճանաչվել է 3-րդ խմբի հաշմանդամ:

«Ունիսոնի» իրավաբանի խորհրդով օրենքով սահմանված կարգով Գ.Նավասարդյանը նախ դիմել է ՀՀ ԲՍՓ գործակալությանը արտադատական կարգով որոշումը բողոքարկելու համար, սակայն գործակալությունը անհիմն այն թողել է անփոփոխ:

            Ի վերջո Գ.Նավասարդյանի խախտված իրավունքները վերականգնվել է դատական կարգով: «Ունիսոնի» փաստաբան Գայանե Խաչատրյանը կազմել է հայցադիմումը, ինչպես նաև ներկայացրել Գ.Նավասարդյանի շահերը  ՀՀ Վարչական դատարանում:

ՀՀ Վարչական դատարանը քննության է առել Գագիկ Նավասարդյանի հայցադիմումն ընդդեմ Գեղարքունիքի մարզի թիվ 1 ԲՍՓՀ-ի և ՀՀ ԲՍՓ գործակալության` Գեղարքունիքի մարզի թիվ 1 ԲՍՓՀ-ի որոշումը, որով Գ.Նավասարդյանի նկատմամբ սահմանվել էր հաշմանդամության 3-րդ խումբ և այն անփոփոխ թողնելու մասին ՀՀ ԲՍՓ գործակալության որոշումները փոփոխելուն պարտավորեցնելու մասին, և գտնելով, որ հայցադիմումը հիմնավոր է, վճռել հայցը բավարարել` փոփոխել վերը նշված որոշումները և պարտավորեցնել Գագիկ Նավասարդյանի նկատմամբ սահմանել հաշմանդամության 2-րդ խումբ` անժամկետ:

Հաշմանդամի խախտված իրավունքի վերականգնումը դատական կարգով «Ունիսոնը», որն իրականացնում է երկարատև ծրագիր ԲՀԻՕՀ աջակցությամբ, դիտարկում է որպես կարևոր նախադեպ Հայաստանում հաշմանդամների իրավունքների պաշտպանության գործում։