Բաց նամակ - դիմում

Հեռուստատեսության եւ ռադիոյի ազգային հանձնաժողովի անդամներին

Հայաստանի Հանրապետության փոփոխված Սահմանադրության 83.2 հոդվածի համաձայն Հեռարձակվող լրատվության միջոցների ազատության, անկախության եւ բազմազանության ապահովման նպատակներից ելնելով՝ օրենքով ստեղծվում է անկախ կարգավորող մարմին, որի անդամների կեսը վեց տարի ժամկետով ընտրվում է Ազգային ժողովի կողմից, իսկ մյուս կեսը նշանակվում է Հանրապետության Նախագահի կողմից՝ վեց տարի ժամկետով: Ազգային ժողովն այդ մարմնի անդամներին ընտրում է  պատգամավորների ընդհանուր թվի ձայների մեծամասնությամբ: Միաժամանակ՝ Սահմանադրության Եզրափակիչ եւ անցումային դրույթներ գլխի 117 հոդվածի 11-րդ կետը նախատեսում է` 83.2-րդ հոդվածով նախատեսված անկախ մարմնի գործող անդամները շարունակում են պաշտոնավարել մինչեւ Հեռուստատեսության եւ ռադիոյի մասին Հայաստանի Հանրապետության օրենքով սահմանված իրենց լիազորությունների ժամկետի ավարտը: Նրանց պաշտոնավարության ժամկետը լրանալու կամ լիազորությունների վաղաժամկետ դադարեցման դեպքերում թափուր տեղերը լրացվում են հաջորդաբար Ազգային ժողովի եւ Հանրապետության Նախագահի կողմից: Այսօր գործող Հեռուստատեսության եւ ռադիոյի ազգային հանձնաժողովի անդամների պաշտոնավարման տարբեր ժամկետները ստեղծում են մի իրավիճակ, երբ Սահմանադրական պահանջին՝ 50:50 հարաբերակցությանը հասնելու համար կպահանջվի մինչեւ 6 տարի ժամանակ:

Ստեղծված իրավիճակից հնարավորինս շուտ դուրս գալու ճանապարհը Ազգային հանձնաժողովի անդամների լիազորությունների կամավոր միաժամանակյա դադարեցումն է ու նոր՝ Սահմանադրության պահանջներին համապատասխան հանձնաժողովի ձեւավորումը:

Մենք դիմում ենք Հեռուսատեսության եւ ռադիոյի ազգային հանձնաժողովի անդամներին` կոչ անելով դրսեւորել քաղաքացիական կամք ու Հեռուստատեսության եւ ռադիոյի մասին ՀՀ օրենքում փոփոխություններ կատարվելուց հետո ամբողջ կազմով հրաժարական տալ, որից հետո Ազգային ժողովի եւ ՀՀ նախագահի կողմից կնշանակվեն Ազգային հանձնաժողովի նոր անդամներ եւ միանգամից կկատարվի Սահմանադրության պահանջը:

Մենք հավատում ենք, որ դուք կդրսեւորեք քաղաքացիական այդ պատասխանատվությունը եւ կանսաք ողջախոհության մեր կոչին:

Գործընկերություն հանուն բաց հասարակության նախաձեռնություն` ներկայացնում է քաղաքացիական հասարակության վաթսունից ավել կազմակերպություն